家好月圓~大團圓

40集的家好月圓, 最後的八集一連7日終於做完了.

還記得上年睇完溏心ending, 我即係同佢起左個朵叫"爛尾溏心" (就係因為最後那場低特技嘔心非常的顏色雨)

啱啱睇完今次的ending, 貫切全輯的風格: 老套依然~~不過一絲絲的感動確然存在~~呵呵.

最初睇家好月圓, 真係有期待的, 好多時d劇的續集唔會夠第一輯好睇.  家劇開初的一星期, 最大感覺就係好嘈.  日日吵野, 聽到sa姨把聲都驚...10集之後, 開始發覺有d唔對路 : 集集都嘈咬, 每兩集一個小故事, 當中有人被屈, 有人郁手, 有人cry, 最後又有人企出來正義兮兮咁講"真相", 然後大家攬埋一團, 冰釋前縑~~呢個方程式, 再加上好似無乜主體劇情, 真係覺得似處境劇多過連續劇~~~一咁唸之後, 又可入返正常軌道, 繼續睇......漸漸地, 唔知係習慣左定咩, 嘈吵場面亦接受到唔覺煩了 (所以d人俾身邊人日鵝夜鵝一段時間後, 應該習慣到唔再有異常反應..大概就係咁解)

今次感覺荷媽沒有了大契的霸氣, 沒有經典對白出來了...記得上年睇時, 多次有"嘩~強呀!"的感覺; 另外鍾家欣的煩擾度比上次更勁 (係, 上次我已覺得佢好煩) 今次真係太過喇...亦可能因為劇中所有的角色設計都帶討好成份 / 有發揮的, 相對地佢就更"突出"了...

除左以上兩點之外, 其他位我都覺得今次做得好好的 :

-陳法拉成功洗底了~~除了角色討好之外, 佢真係俾心機去做的.  起碼出來的感覺令人順服; 有時d群戲都見到佢有交足表情的

-阿卡比起細鮑好多了...起碼似正常人d先~~~呵呵~~~陳豪本身易入屋, 所以唔做得太差都感覺良好

-紅姐, sa姨的角色設計比上次更對味; 根本米雪就應該做奸啦~~佢似二奶多過關好多~~

-楊怡係我最like的TVB花旦, 佢同阿卡相反, 我覺得佢上套戲做JACKY好發揮D..不過又係因為"入屋", 所以感覺良好的

-Jo飽角色設計非常人性化; 佢同志信簡直係某類男人的sample~~現實有這些男人?? 我信, 仲唔少添.

-家美的角色都十分人性化 (我就認識過這樣女子).  無論forum上幾多人質疑佢的姿色, 但戲中佢的表現, 的確夠放夠姣, 做到"索女"的感覺.

-對白無上次咁經典, 反而覺得為講而講的古老話太多太著跡了.  不過, 當中好多位都係套用返上輯的對白, 睇得到呢份心思.

**如果以處境劇咁去睇, 一劇中有咁多夠卡士夠份量的人做, 的確賞心悅目的**

 

P.S. : 我喜歡邊睇邊駁故, 因為咁先有樂趣, kaka...今日呢兩集我駁足咁耐, 直至出到Jo 飽話 : 我健康比你好, 你死得比我早~~~嘩~~~!!!睇左40集終於有返上次 "嘩~強呀!"的感覺, 眼眶即時濕晒.  因為呢樣野係我耐不耐同榮仔講的. Jo飽將佢具體化左出來~~~都係果句 : 強強強!!! (不過眼濕濕唔係維持好耐, 轉頭佢地突然攞來猜攻就即時由眼濕變左咀O...sigh...

都係多謝TVB有套C9戲俾我enjoy了39個晚上~~^^